محاورة بلدارميات بين حبيبين
مر بية وامشي وياك مر بية وينك
صحره وألك أحتاج أروى بحنينك
مريت ظني الكاج شو ما لكيتج
مثل السراب وراح شو ما دريتج
لا مو سراب وراح مايي اني صافي
واشربني لو عطشان شرب العوافي
مرات طبع الماي مايروي عطشان
يم النهر مشتول بس هو ذبلان
ذبلان ليش تكول مو هذا غصنك
اخضر حلو وشفاف عاجبني حسنك
اخضر ولو ذبلان كوة علية
مازاعل العصفور لو يمر بية
احسبني لو عصفور بس كون ازورك
ارتاح لحظة وياك وافهم شعورك
ارتاحي بس بعيد مو على اغصاني
خافن ترى تجويج شجرة احزاني
جا وين احط تريد وارتاح كَلي
متعوبة الجنحين ومابية اعلي
اشتعب الجنحين غير المسافة
عمرج خلص تجوال لا يا حسافة
تجوال ادور عليك يا غصن عمري
وماردت غير اغصان بية انت تدري
ادريج ما تردين بس ما وفيتي
من شح علية الماي طرتي وعليتي
سامحني انت بهاي وافهم ظروفي
خفت انا ماكو ماي وأذاني خوفي
ما سامح انا بهاي وانسي شعوري
لا بد يجيني الماي طيبة جذوري
ادري الجذر بي طيب بس الزمن جار
خلانا نهوى الكاع ونعوف الاشجار
ما دامج تعرفين ألمن عتابج
المفروض ماتنسين شجرة احبابج
ما ناسية وارجوك انطيني فرصة
غصات بية هواي مو فرد غصة
بس كافي لا تحجين وشألج عندي
كل الطيور وياي بس انتي ضدي
مو ضدك اني وياك بس جنت ذبلان
العصفور يفرح حيل لو خضرة الاغصان
من واجب العصفور ما ينسى الاشجار
ينصب مآتم نوح ويفزع الانهار
فزعت ماكو ماي كلهم صحاري
بدموعي ردت ارويك وبعيني اداري
شنو الفايدة تفزعين فزعتي شمات
ما دام احب الطيور ماموت هيهات