السلام عليكم ,, اليوم راح اسولفلكم لمن اني و لملوم لعبنة وية المنتخب العراقي ضد فريق موزمبيق,مباراة ودية فريقنة استعدادا لكاس الخليج و منتخب موزمبيق حتى لا ايجيم ,, لان صارلهم 13 سنة ما لاعبين و نص لواعبهم اتقاعدو بسبب فقر الدم كملو 5 لواعيب من فريق السلة , المهم , و لانه موزمبيق دولة متطورة جدا ,, فكتاب الاتحاد الموزمبيقي الصادر بتاريخ 37 - 15 -2010 (مو هو عدهم 19 شهر كل شهر بي 66 يوم فهمة هسة بسنة 1145 بعدهم ) أشار الى انه الطوبة من عدنة ,, و لوما فشلة جان كلونة جيبو الملعب و شحنونة الحكم و مساعد الخط , قصدي مراقب الخط ,,
المهم موزمبيق ما عدهم مطار ,, هو مشتمل صغير بي شاب كاعد على كرسي يختم بالجوازات و ما عدهم ختم هية مقطاطة دائرية درجة عاشرة حتى ما بيها نصف قطر (اتصير ارخص) ام المراية تارسيها فحم و يلطشون بيها الجوازات ,,
المهم ,لكينة وصلة كاع تابعة للحديقة المحيطة بقصر الرئيس الموزمبيقي , بدت اللعبة و الفريق الموزمبيقي انتشر بالساحة , منتخبنة و اني و لملوم جنة حافظين الخطة ,, الخطة كلش بسيطة : فوزو ,, (اي فريق موزمبيق ما يرادلة خطة اصلا المدرب مالتنة بوكنها جان مصيف بتركيا ما يدري باللعبة)
بدت اللعبة و لملوم هو اللي فضحنة ,, كلساع يجي عليه ,,
- ابن الخبل ارجع لموقعك لا تعوف الموخرة
- ارجع لموقعي وين ارجع لبغداد؟؟
و طلع ديريد يخرج من الملعب و صحتة ابن الخبل ارجع للمكان الجنت بي انتة مو دفاع ؟
- لا تعليم عالي
- ابن الخبل موقعك دفاع مو وزارة الدفاع ارجع ,,
لملوم ظل يرجع الى ان طلع برة الملعب و لكة نفسة بصف محل عصير بيتنجان (مو همة هناك يسوون منة شربت هم) و لازم قدح عصير و منتظر تجي طوبة الخبل عباله بعدة بالملعب ,,
الحكم صومالي و يشتبه بي شيزوفرينيا بحالة متأخرة ساعتين ,, طرد مراقب الخط و طلع كارت احمر على علم الزاوية فاجوي شالو لان قوانين الحكم لازم تمشي (ممنوع تركض) ,,
ما اعرف شون موزمبيق جابو كول ,, الكولجي مالتنة استغل ماكو هجوم موزمبيقي راح لغير محلة دياخذ صور ,, و عاف الكول فارغ و اني كلساع عيني عليه انتظرة يرجع خاف احد يسرق الشباك لان هم جايبيها ويانة وية الكرة , لملوم راح الخبل يحتفل وياهم و جماعتنة يفشرون عليه و يعتبر هذا اول هدف اتسجلة موزمبيق منذ يوم استقلالها اللي صادف خميس العصر بس ما اعرف يا سنة ,, و رجعنة لملوم بالكفخات و فهمنا الكول علينة ,, لملوم وصيتة الزم اي شخص اتشوفة مان تو مان و لا تخلي يعبر ,, النتيجة لملوم اخذ انذار
- - انتة مو كتلي الزم واحد
- - ابن الخبل تلزم الحكم ؟؟؟ اي الحكم شعلية قابل راح يكول علينة؟ و شنو تسحلة من شورتة؟ المفروض يطردك
- - زين هو الحكم ليش لابس اسود؟ منو ماتله ؟؟؟
- - لملوم ارجع لموقع او اكلك اطلع هجوم
- - - زين مراقب الخط ليش يراقبه؟
- شنوة ؟؟
- - للخط
- حتى لا ينهزم ,,, لك ارجع عاد خررب
طبعا لملوم طلع هجوم و الفرص كلها ضاعت ,, لانه عايف اللعبة و واكف بصف الكولجي ديسولف ويا و يكلة هو خريج روضه بتقدير عفية يا بطة ,, و يريد تعيين بالمخابرات الموزمبيقية حتى لو يشتغل تلفون ارضي (عبالة مخابرات يعني يخابرون) او يشتغل صفرين علمود الدولي او اي شي و الكولجي اصلا من الجوع سمعة ثكل و اخر شي نزع البوتين و كام يركض ورة لملوم اللي وصل لعلم الزاوية و شلعة و استعملة رمح و كام يحرك بي ,, احنة استغلينة الكولجي ماكو واحد من منتخبنة ضربها من بعيد جتي كول ,,
الموقف ورة 5 دقايق ,, موزمبيق ديلعبون ضربة السنتر و 2 ديركضون بالملعب لملوم و الكولجي اللي كاعد يلحك بي لان لملوم كايلة ابن الصكط ,,
كولجينة خابرنة من بغداد يكول هو ضاج فراح يسلم على اهلة اذا موزمبيق جتهم طوبة دكولي مسكول ,, و اني باللعبة جنت عنصر ايجابي ,, بس اوجه كرشي جهة اللاعب يرتد باتجاه لي ورائي بصورة تامة ,, و بهال طريقة كدرنة انجيب كول لاخ و خلصت 2-1 ,,
مدرب موزمبيق هدولة سيارة لان فريقة جاب كول ,, و اللاعبين صرفولهم كل واحد صك ب 4 دجاجات و طرشي و احنة رجعنة ,,, و هاي ثاني مرة ازور بيها موزمبيق ورة ما انطوني شهادة لان اني مدارس بالعراق دارس برة !!
موضوع: مباراتنا مع موزمبيق 
